اسلام آباد۔2اگست (اے پی پی) وزیراعظم محمد شہباز شریف آکھیا جو فلسیطن اچ صہیونی ریاست انسانیت دے خلاف جرائم دی ہر حد پار کر چکی اے، نہتے فلسطینیاں دی فوری طور انسانی ہمدردی دی بنیاد تے امداد تئیں رسائی یقینی ٻݨائی ونڄے۔ او آئی سی دے پلیٹ فارم کوں ٻیا فعال ٻݨایا ونڄے، عالمی عدالت انصاف دا فیصلہ، اقوام متحدہ اتے سلامتی کونسل دی قرارداداں، جنیوا کنونشن اتے انسانی حقوق دی تنظیماں دے اعلامیے، پوری دنیا ولوں جنگ بندی دی اپیلاں، ساریاں کجھ بارود دی نظر تھی ڳئے۔ دنیا تے بے رحمی تے بے حسی اتے بارود دا راج اے۔ دنیا دے امن اتے ترقی کوں انہاں کماں توں خطرہ اے۔ عالمی ادارے اتے دنیا ایندا نوٹس ڳھنے۔ جمعے کوں قومی اسمبلی اچ ڳالھ مہاڑ کریندیں ہوئیں وزیراعظم محمد شہباز شریف آکھیا جو ہک ایجھے ویلھے جݙاں پورا پاکستان اتے عالمی اسلام تہران اچ اسماعیل ہنیہ دی شہادت تے اشک بار اے، اے خوش آئند اے جو اے معزز ایوان متفقہ قرارداد ڳھن تے ائے۔ ایں تے حکمران اتحاد شامل جماعتاں اتے متحدہ اپوزیشن دا شکریہ ادا کریندوں۔ انہاں آکھیا جو ایں ایوان دی آواز پوری دنیا اچ ویسی اتے ایں نال دشمنان پاکستان دے دل دہل ویسن اتے پاکستان دی دوستاں کوں طاقت ملسی۔ وزیراعظم اکھیا جو گزریل ݙینھ ایں بارے اتحادی جماعتاں دا اجلاس وی سݙیا ڳئیا جئیں اچ اچ انہاں پوری رہنمائی کیتی اے۔ انہاں آکھیا جو اساں بہادر فلسطینیاں نال یکجہتی کریندوں جو تاریخ دے بدترین ظلم، جبر اتے سفاکی دا سامݨا کریندے پئیوں۔ فلسطین مقتل گاہ ٻݨ ڳئی اے۔ صہیونی ریاست 9 مہینے توں قتل عام کریندی پئی اے اتے چالھی ہزار توں ودھ ٻال تریمتیں سودھے فلسطینیاں کوں شہید کیتا ڳئے۔ پوری دنیا دے کروڑاں مسلمان اتے ہر مذہب توں تعلق رکھݨ آلے ارباں انسان وی اڄ ایہو سوال کریندے پئن، اے کہیں خاص مذہب یا عقیدے دا سوال نی بلکہ انسانیت دا سوال اے۔ اے قانون اتے عدل دے ہکو سویں اطلاق دا سوال اے۔ انہاں آکھیا جو اے انہاں اصولاں اتے قرارداداں اتے عملدرآمد دا سوال اے جئیں کیتے اقوام متحدہ، سلامتی کونسل اتے انسانی حقوق دی تنظیماں معرض وجود اچ آئی ہن۔ وزیراعظم آکھیا جو اصل سوال ایں انصاف دا اے جئیں دے سنہرے اصولاں تے انہاں دے چارٹر تیار تھیے۔ اڄ انہاں انساناں دا لہور پکار پکار تے انصاف کیتے سݙیندا پئے۔ صبر دا پیمانہ لبریز تھی ڳئے۔ فلسطین اچ صہیونی ریاست انسانیت دے خلاف جرائم دی ہر حد پار تھی ڳئی اے۔ عالمی عدالت انصاف دا فیصلہ، اقوام متحدہ اتے سلامتی کونسل دی قرارداداں، جنیوا کنونشن اتے انسانی حقوق دی تنظیماں دے اعلامیے، پوری دنیا ولوں جنگ بندی دی اپیلاں، ساریاں کجھ بارود دی نظر تھی ڳئے۔ دنیا تے بے رحمی تے بے حسی اتے بارود دا راج اے۔ اگر انصاف دے تقاضے پورے نہ کیتے ڳئے اتے بے گناہ انساناں دے قتل عام کرݨ آلی ریاست کوں انصاف دے کٹہرے اچ نہ آندا ڳئیا تاں عامی غیض و غصب دے لاوے کوں روکݨ ولا کہیں دے وس دی ڳالھ کائنا ہوسی۔ انہاں آکھیا جو کبوتر وانڳ اکھیں بند کرݨ نال کم کائنا چلسی، 31 جولائی کوں اسماعیل ہنیہ کوں اوں ویلھے شہید کیتا ڳئے جڈاں او تہران اچ ایران دے نو منتخب صدر دی حلف برداری دی تقریب اچ شرکت کیتے موجود ہن۔ اے امن دی کوششاں کیتے ٻہوں وݙا دھچکا اے۔ انہاں آکھیا جو پاکستان دی حکومت اتے عوام ولوں ایں قتل دی شدید مذمت کریندیں ہوئیں شہید دے ٹبراں اتے فلسطینی عوام نال یکجہتی کریندوں۔ پاکستان ماورائے عدالت اتے علاقائی حدود دی خلاف ورزی کر تے کیتے ڳئے قتل دی ہر طرح دی دہشت گردی دی مذمت کریندے۔ ایں کاروائی اچ جو وی ملوث اے اونکوں قانون دے کٹہرے اچ آندا ونڄے۔ صیہونی ریاست انہاں جرائم اچ ملوث اے۔ اے اسرائیل دی سفاکانہ کاروائی کوں نشابرکریندے۔ وزیراعظم آکھیا جو ایں سال 10 اپریل کوں اسماعیل ہنیہ دے 3 پتر اتے 4 پوترے پوتریاں کوں شہید کیتا ڳئے۔ تاریخ اچ انہاں قربانیاں کوں سنہری حروف اچ لکھیا ویسی اتے اے قربانیاں ضائع کائںا ویسن۔ اے خون رنگ لیسی۔ اڄ ݙو اگست کوں پاکستان اچ سوگ منایا ویندا پئے۔ اے وی فیصلہ کیتا ڳئے جو پاکستان فلسطین کوں امدادی سامان دی فراہمی جاری رکھیسی اتے مظلوم فلسطینیاں کیتے طبی سہولتاں ݙیوݨ کیتے اقدامات کرے۔ زخمیاں کوں علاج کیتے پاکستان آندا ونڄے۔ اساں فیصلہ کیتے جو فلسطینی طلبہ کوں انہاں دی تعلیم جاری رکھݨ کیتے پاکستان دے میڈیکل کالجز اچ ہنگامی بنیاداں تے داخلہ ݙتا ویسی۔ وزیراعظم آکھیا جو نہتے فلسطینیاں دی فوری طور انسانی ہمدردی دی بنیاد تے امداد تئیں رسائی یقینی ٻݨائی ونڄے۔ او آئی سی دے پلیٹ فارم کوں ٻیا فعال ٻݨایا ونڄے۔ وزیراعظم آکھیا جو پاکستان دی سفارتی پالیسی بابائے قوم قائداعظم محمد علی جناحؒ دے مضبوط موقف دی بنیاد تے اڄ وی جاری اے۔
