اسلام آباد۔29جولائی (اے پی پی) وفاقی وزرا خواجہ محمد آصف اتے احسن اقبال چیف جسٹس قاضی فائز عیسی دے خلاف شرانگیز پراپیگنڈے اتے قتل دے فتوی دی مذمت کریندیں ہوئیں آکھیا جو چیف جسٹس دے خلاف شرانگیز پراپیگنڈا، قتل دا فتوی قابل مذمت اے،ریاست ایجھی آوازاں دے خلاف فیصلہ کن کاروائی کریسی، فساد کھنڈاوݨ آلیاں نال سختی نال نبڑیا ویسی۔ ہر خاص اتے عام کوں ݙساوݨ چاہندوں جو ریاست کہیں کوں کہیں دے قتل دے فتویٰ جاری کرݨ دی موکل کائنا ݙتی ویسی۔ او سنوار کوں پی ٹی وی ہیڈکوارٹرز اچ سانجھی پریس کانفرنس توں خطاب کریندے پئے ہن۔ وزیر دفاع خواجہ محمد آصف آکھیا جو اڄ ہک گروہ ولوں بے بنیاد پراپیگنڈہ شروع کیتا ڳئے۔ قاضی فائز عیسی بارے جو ڳالھ کیتی ڳئی اے، ماضی اچ وی ولا ولا ایں دی وضاحت کیتی ڳئی اے جو قاضی فائز عیسی دا کہیں فیصلے یا بیان نال کوئی تعلق کائنی۔ پاکستان اچ مذہب دے ناں تے خون خرابے دی کوشش کیتی ویندی پئی اے۔ سپریم کورٹ وی ایں بارے وضاحت کر چکی اے۔ حضورؐ سارے جہاناں کیتے رحمت العالمین ٻݨ تے آئے، ایجھے مذہب دے ناں تے جو رحمت اتے برکتاں دا مذہب اے ایندے اچ ایں قسم دے فتویاں دی کوئی گنجائش کائنی۔ اے سارا کڄھ کوڑ اے۔ انہاں آکھیا جو ختم نبوت اساݙے ایمان دا حصہ اے۔ وزیر دفاع خواجہ محمد آصف آکھیا جو بے بنیاد الزام دی وجہ نال ای سزا ہوندی اے۔ انہاں آکھیا جو چیف جسٹس قاضی فائز عیسی دے خلاف کافی عرصے توں سازش چلدی پئی اے۔ اساݙی اعلیٰ عدلیہ آئین دے مطابق فیصلے اتے آئین دی تشریح کریندی پئی اے۔ وزیر دفاع خواجہ محمد آصف ہک سوال دے ولدے اچ آکھیاجو ہر بندہ مذہب کوں استعمال کر تے آپݨی سیاسی دوکان چمکاوݨ چاہندے ایندی موکل نہ ݙیسوں۔ انہاں آکھیا جو پچھلے دھرنے بارے قاضی فائز عیسی دے فیصلے دے بعد توں انہاں دے ٹبر کوں ٹارگٹ کیتا ڳئیا۔ انہاں آکھیا جو سو فیصد کوڑ دی بنیاد تے چیف جسٹس قاضی فائز عیسی دے خلاف فتوی ݙتا ڳئے اتے ہک کروڑ روپے انعام رکھیا ڳئے۔ وفاقی وزیر منصوبہ بندی، ترقی تے اصلاحات اتے خصوصی اقدامات پروفیسر احسن اقبال آکھیا جو چیف جسٹس آف پاکستان عدلیہ دے سربراہ ہن اتے عدلیہ اہم ریاستی ستون اے۔ انہاں بارے بیان پاکستان دے آئین اتے دین نال کھلی بغاوت اے۔ انہاں آکھیا جو اے او طبقہ اے جئیں کوں 2018 اچ خاص مقصد کیتے کھڑا کیتا ڳئیا ہئی۔ پاکستان اچ آئین، عدالتاں اتے قانون موجود اے اتے کہیں شخص یا گروہ کوں موکل نی او کہیں دے قتل دے فتوے جاری کرے۔ انہاں لوکاں دے خلاف قانون حرکت اچ امسی۔ انہاں آکھیا جو کہیں مسلمان کوں آپݨے عقیدہ ختم نبوت ﷺ کیتے کہیں جماعت توں سرٹیفیکیٹ ڳھنݨ دی لوڑھ کائنی۔
.jpg)
