استنبول۔23اکتوبر(اے پی پی) وفاقی وزیر داخلہ محسن نقوی استنبول اچ ترکیہ دے وزیر دفاع یسر گلیر (Yasar Guler) نال اہم ملاقات کیتی۔ ترکیہ دے وزیر دفاع استنبول اچ انٹرنیشنل ایکسپو اچ شرکت تے وفاقی وزیرداخلہ محسن نقوی دا شکریہ ادا کیتے۔ وزیرداخلہ محسن نقوی ترکیہ دے وزیر دفاع کوں پاکستان اچ تھیوݨ آلی آئیڈیاز ایکسپو اچ شرکت دی دعوت ݙتی ۔ ملاقات اچ سانجھی دلچسپی دے امور سودھے پاک ترکیہ تعلقات ودھاوݨ تے تفصیلی ڳالھ مہاڑ کیتی ڳئی ، پاکستان تے ترکیہ وچال مختلف شعبیں اچ تعاون تے تجارت ودھاوݨ دی اہمیت تے زور ݙتا ڳئے ۔ݙوہیں وزرا پاکستان تے ترکیہ وچال ݙوپاسے اشتراک کار دی موجودہ رفتاردی تعریف کیتی ۔ ملاقات اچ بہترین سانجھے مفادات اچ اشتراک کار ودھاوݨ دے مزید رستے ڳولݨ دا عزم کیتا ڳئے ۔ ملاقات اچ پاکستان توں گوشت دی برآمدات ودھاوݨ تے ڳالھ مہاڑ کیتی ڳئی ۔ ترکیہ پاکستان توں گوشت دی برآمد سانڳٖ ہر ممکن تعاون دی پیشکش کیتی۔ وزیر داخلہ محسن نقوی ترکیہ دے وزیر دی طرفوں گوشت دی برآمد دی پیشکش دا خیر مقدم کیتا۔ وزیر داخلہ محسن نقوی آکھیے تجارت سودھے مختلف شعبیں اچ تعاون ودھاوݨ تے ترکیہ حکومت دا خیرمقدم کریسوں ، ݙو پاسے تعاون کوں تکڑیاں بنیاداں تے ٹورݨ سانڳے سانجھے وفد دے دورے ضروری ہن ۔ وزیر داخلہ محسن نقوی استنبول اچ بین الاقوامی نمائش سانڳے ترک حکومت دے بہترین انتظامات دی تعریف کیتی ۔ ترک حکومت دے اعلیٰ حکام دے علاوہ پاکستانی سفیر ڈاکٹر یوسف جنید وی ایں موقع تے موجود ہن۔
